《讀者投稿》
同老公(當時係男朋友)拍咗拖幾個月就意外有咗，當時二人世界係外面同居好開心，仲養咗兩隻貓貓，但我地決定要個bb為咗慳錢就搬去老公屋企養胎。老公屋企有6299(大仔一早頂唔順搬出去)住村屋三樓連天台嗰種，諗住空間大啲又可以俾d貓自由奔跑，懷孕三個月就搬咗入去。
一開始99好熱心話要好好準備一下執好間房俾我地住，搬過去前一個星期，佢就換過晒房間啲牆紙，當時我嗅覺已經幾靈敏下，搬入去訓覺都聞到啲裝修味，但人地一番好意我都無多講啲咩。隔咗兩個禮拜左右，啲牆紙唔知係quality問題定咩開始甩，99就自把自為趁我地出街又換過晒啲牆紙！其實本身啲味已經勁，換第二批啲味仲勁，一返屋企已經攻到我勁頭暈呼吸困難，我即刻上網睇資料，任何新裝修物料當中含有甲醛，對孕婦同胎兒都極度有害！老公同佢反映問題，99仲話聞唔到有味，明明兩隻貓貓都打晒乞嚏！最搞笑既係走黎問我點解啲牆紙咁易甩，係唔係關我個佛牌事，乜唔係應該反省下係咪啲膠水問題或者啲牆紙太cheap？無知真係好可怕！
之後我同老公被逼要訓天台房仔，天台係半玻璃屋半露天，房仔有張碌架床堆滿雜物，執咗好耐先有得訓，身心都已經好疲累，我老公都執到隻狗咁。夏天住玻璃屋唔單止熱到癲，開行冷氣都吹唔到入房仔要再開把大風扇，極度chur電，卒之電費埋單4千幾(就算搬出去住，夫家水電煤都係老公負責俾錢，平時電費1-2千左近)，4個人住可以食咁多電咩？計過條數，我、老公、62都要返工，平時得99一個係屋企，以我所知就算佢上天台洗衫、係廚房煮食，客廳冷氣電視都會長開，有時仲會開晒所有野訓晏覺(冷氣2匹3級能源、電視65寸)，咁又好難怪電費咁Q貴，老公同99呻下啦，99無啦啦發癲話個仔怪佢，又鬧又喊搞到好薑，丟咗2千蚊俾我老公，仲同大仔講是非話細仔想郁手打佢咁，我同老公都O晒咀。
平時我係99講是非既對象，俗稱‘’是非當人情‘’，可能平時佢冇朋友冇人傾計，我搬入去之後，99成日捉住我就講晒祖宗十八代、同埋隔離左右鄰居既是非，我通常都唔會出聲或俾反應，淨係做自己野聽佢狗嗡，因為我知道，99係有被害妄想症，成日話鄰居搵人跟蹤佢監視佢，同6299出去買野，99都會拉住我快步行，又會指住街頭街尾啲麻甩佬話嗰個人一定係邊個邊個派黎跟佢既⋯ (講到呢度，真係好撚想笑狗99)
終於捱到結婚註冊，真正嫁咗入門，不過⋯ 早係結婚之前，99已經對我發過幾次脾氣，成日嫌我懶，其實係老公錫我想我安胎養胎，唔好操勞而唔俾我幫手家務，老公自己攬晒黎做；仲話我冇禮貌唔叫人，次次叫佢好似撞聾咁時運高聽唔到，又教我唔好同啲鄰居打招呼。有次本身99同我老公嘈交變咗搵我出氣埋怨咁，仲大讚老公啲前女友有幾好，話我不明來歷好擔心個仔既將來之類，好彩老公叫我錄音，send番俾老公同99個大仔聽都覺得好很離譜。我未嫁入門就俾咁多說話我聽，我都有阿媽生有阿媽錫，憑乜嘢99要咁講嘢？仲好似我錯撚晒咁，明明我乜都冇做過。
同6299同住短短幾個月，老公已經頂唔順，我仲安慰番佢轉頭，我覺得我既EQ高過龍(全靠自己係娘家鍛鍊得好..我娘親都唔好得幾多)。搬出去既念頭越黎越大，但考慮到生b開支大，又要交租，我又辭職湊b，老公壓力越黎越大，返正職之餘仲要夜晚放假做兼職，我都好心疼老公咁辛苦⋯ 但99依然冇體諒過個仔，自己發脾氣當我地透明，連62都聽晒99片面之詞，覺得個仔唔孝順，覺得我呢個新抱係衰女人，教壞佢地個仔。
＃我的極品四大長老
Search